उल्हास
आज पाहिला उल्हास
पाना पानांच्या रोमात
कणाकणात हवेच्या
ओल्या मातीच्या मनात
आज हासले अवघे
तृण, पाणी, रोपे, वारे
धुंद नाचले ओहळ
दूर सरले किनारे
आज आनंदी आनंद
उरे व्यापुन आकाश
आले भरून भूमीचे
खोल तडे सावकाश
"आज पावसाला माफी
आज माफी वादळाला
आज वेदनांवरती
तृप्त मोद अंकुरला
आला भादवा भेदून
आर्द्र श्रावणाची कूस
उंच वृक्षांच्या वक्षात
कोंब पावले विकास
आज सर्वत्र उल्हास !
(~ राम शेवाळकर / असोशी)
!! मराठी भाषा दिवसाच्या - अनेक शुभेच्छा !!
